Em Ääschme sini fründin isch d Täitäi, won äigetli Häidi Täiler häisst. Si isch guet zää jaar jünger als der Ääschme. D Täitäi isch z Chüsnacht oben uufggwachse, chund us guetem huus, ire brüeder häd e farbefabrik. Won ire vatter gschtoorben isch, hät d verwandtschaft sii und iri mueter, wo blos us em undere mittelschtand choo isch, us de familiewila usegschtelt. Si hät sich drum sälber müese dureschlaa. Wä me das wäiss, verschtaat men au iri aasichte, wo mängem lingge sozi ali eer mieched. I irer juget hät si z Pariis bim abbé Pierre gschaffet – isch aber nöd so begäischteret gsii von em. Akzie vo de fabrik häd ere de brüeder schpööter dänn gliich müese gèè. Aber si macht sich nüüt druus und häd allpott en anderi schtell. Der Ääschme chönt nöd emaal säge, öb si etz telifonischtin ggleert heb oder buechhändleri. Als bäides hät si sicher scho gschaffet. Si känt en huuffe lüüt, psunders im Döörffli. De Täitäi iri verwandtschaft cha men im familieromaan ‹kä helde› käneleere.
De Schtäiner isch em Ääschme siin tröie suuffkumpaan. D tröii isch aber uf beede siite. Er hät vor vile jaar müesen en proschpäkt mache für d polizei und isch bi dère gglägehäit uf der Ääschme gschtoosse. D beschprächige händ seriöös im Ääschme siim büro aagfange und glii emaal i der Iwonn-Baar ggändet – weniger seriöös. Sider gid äis glaas em andere d hand – wie de Schtäiner wüür säge. Aber käine miech em andere de voorwurff, er verläit en zum trinke. Das wèèr uggrächt. Bäidersiits.
Im gägesatz zun öis ggwööndliche schtèèrpliche altered romaanfiguure lengsemer. Der Ääschme, d Täitäi und de Schtäiner händ sind guet ghalte. Öppe gliich wien em Ääschme siin koleeg, de commissaire Maigret, wo 1913 sini eerscht enquête ggmacht hät und 1972 sini letscht. Nach em chrieg isch er zwüschetine sogaar epaar jaar lang pangsioniert gsii.
